(( الأربعين ))

ادري ان الوقت يذهب ما يعود

اربعينٍ فارقتني يالعنود

ماطر الايام من غيم الزمان

ما يبل الريق لو مهما يجود

كم شربته صافيٍ بارد قراح

ما دريت ان الظما سر الوجود

كل شمسٍ تلمس اشجار العمر

تحرق الاوراق وتجف الفنود

وكل ريحٍ تدفع شراع العمر

ينقطع به حبل ويميل العمود

اربعين مرت وتوني صغير

انتظر لعل تصدق لي الوعود

والغريب اني على هذا مغبوط

ادري اني بخير لا شفت الحسود

الزمن يا بنيتي كله زوال

ما تخلد كود لحظات السجود

لااا .. تجرحيني

أغصان المساويك

تجلس عجوز .. في اول السوق ..

وبين الشبابيك .. وتبيع السوالف ..

وأغصان المساويك ..

ومايخالف ..لو باعتني الحكي ..

الحكي غالي هــ الايام ..

مريتها .. ابي الكلام ..

قلت : ياخاله أنا ..

ان نسوني الناس .. زعلت ..

والى اذكروني الناس .. زعلت ..

صمتي وحروفي مبعثره ..

ضحكت وقالت :

لو عدلت .. سلمت قلب وحنجره ..

ماعطيتها فلوس على هذا التعب ..
وما ريحتني من التعب ..

قمت وعلى عيوني غباش ..

مدت لي مسواك جديد ..

عييت ..

وقالت لي.. إبلاش .

ان كانت سنونك نظاف ..

حطه في جيبك ياولدي ..

يجلي محانيك الرهاف ..

من كل اأحساس ردي ..

أوراق الزمن

ادفن يدي .. تحت الثرى ..

واسقيها من جفني ارق ..

يذبل مابين اصابعي ..

عشب و ورق ..

ادفن يدي .. فوق الثرى ..

يلفها برد وسموم ..

واحس بعروقي يبست ..

ما توصل عروقي الثرى ..

ولا تشرب عروقي النجوم

وينبت على جفني سهاد ..

يذبل ورا صدري الشجن ..

اشقق اوراق الزمن ..

وانام .. في حلقي الليله جفاف ..

شربت أيامي .. ومضت ..

واللي بقى جرحي الوفي ..

في خاطري باب يرد ..

وسراج دوبه ينطفي ..

اغطي الظلمه بظلام ..

كل ما اشد اصابعي ..

على العيون المتعبه ..

جرحٍ ينام ..وجرحٍ شعر بي وانتبه ..

قام وتبعني لشرفة ظلمه بعيد ..

جاني يقاسمني السهاد .. جاني قصيد ..

ادفن يدي تحت الثرى .. فوق الثرى ..

واعيش انا بباقي يدي ..

نصفٍ يموت..ونصفٍ درى انه يموت ..

يا سيدي .. ربي انا نقطه فـ بحر ..

علمني كيف اهوى الحياه ..

علمني كيف اهوى القدر ..

علمني بإماني اكون ..

يارب .. اكثر من بشر ..

آه .. يالجراح

لا جيت أنا بــ سامحك..

تبكي الجراح ما ودها..

مشتاق ودي أصافحك..

عيت يدي لا مدها...

آه. .يا لجراح .. راح اللي راح ..

وراحتي .. من يا ترى بيردها ..

يا حب.. ياذ كرى واسم..

مدري انا ابكي عليك من العذاب اوابتسم..

صدقني في يأسي .. نفسي تبي نفسي تبيك ..

لا يا دفا شمسي تبيك..

ليه خنتني ..الله عليك ..

آه يا الجراح .. راح اللي راح..

وراحتي .. من يا ترى بيردها ..

لا تحاكي عيوني .. يمطر سحاب الملح .

.ولا تلمس أشجوني .. ينبت في قلبي جرح ..

ناظرني يا خلي .. جرح انا كلي ..

وشلون أبـ ارضى الصلح ..

فصل الخريف حبي ..حزن وورق أصفر..

ودعني يا قلبي..وخل العذاب أقصر..

آه يا الجراح .. راح اللي راح..

وراحتي .. من يا ترى بيردها ..

جرحي بخير

ومرت سنه .. على فراقك

على صوتك .. واشواقك

غريب كيف االزمن يرحل

واحلام العمر .. تذبل ..

سنه مرت .. وانا أول ..

حبيبٍ يوقد الشمعه

لجرحه في يوم ميلاده

هلا .. بالحب .. واعياده

وكل عامٍ .. وجرحي بخير

مشيت دروبنا .. خطاوي قلوبنا

ومريت الوعد .. وعدنا العام

ماكان الوعد .. ولا الأيام .. هي الايام

وما ادري ليه هالشارع .. نسوه الناس

ومتى هالمقعد الخالي .. يجوه الناس

حبيبي .. ليه فـ غيابك .. يغيبوا الناس

حبيبي .. ايه والله حبيبي .. ايه والله

نساني العمر.. لو انساه

نساني الفرح .. لو انساه

احبه .. ما ظهر نجم .. ونبت عشب .. وسرى براق

أحبه .. لا زمن يشقي جروحي .. لا جفا .. وفراق

أنا هذا الهوى كله .. وقلبي آخر العشاق ..